01/08/04 Stanton (MO) - Tulsa (OK) / 587 km

 

Nahiko goiz atera ginen, larunbata izan arren. Autopista hartu beharrean, aspaldiko Route 66-tik hasi genuen eguna. Devil´s Elbow izeneko zubitik ere pasa ginen. Honelako tokietan batek irudikatu dezake nolakoa izango zen aspaldiko garaietan bide hau hartzen zutenen ibilbidea...

 

Horretaz aparte, egun horretako ibilbidean Kansas-en zatia egin genuen, apenas mila batzuk. Zenbait herritan gelditu ginen bertan aspaldiko jatetxe zein gasolindegitaz galdetzeko eta bertakoek edo ez zekiten edo zoratuta ginela pentsatzen zuten. Frankiziek aspaldiko paisaiak irentsi egin dituzte. Herri gehienak berdinak iruditu zitzaizkigun: Holiday Inn, Walmart, McDonnalds etab. bai sarreran zein irteeran.

 

Catoosa izeneko herrian bale urdin ospetsua ikusi dugu. Bertan zegoen haurrentzat parke bat, hainbat eta hainbat atrakzioekin. Beste hainbat gauza bezala, egun abandonatuta dago, baina oraindik bere iraganaren testigu hortxe dago bale urdin handia, bere bakardadean gu bezalako bidaiariak agurtu nahian edo.

 

Egun hartan Cuba-tik zein Springfield-etik (Mo) pasa ginen. Aurrekoan, harretaz begiratu arren, ez genuen Fidel Castro ikusi. Bigarrengoan, berriro ere Bart Simpson-en bila ibili ginen. Ez genuen aurkitu eta gainera bigarrengo Springfield hau aurrekoa baino itsusiagoa iruditu zitzaigun.

 

Gure planen arabera, atzeratuta genuen bidaiaren zatia egun horretan errekuperatu egin genuen. Kilometro dexente egin genituen ondorioz eta hiru egun igaro eta gero ipurdiko mina ederra zen. Zorionez, lehendabiziko eguna eta gero ez genuen euririk ikusi eta itxura handirik ere ez zuen. Gure ibilbidea izugarri laua zen eta beraz aurretik zetorren eguraldia jakiteko urrutira begiratzea nahikoa zen. Iluntzen ari zela Tulsara iritsi ginen (Oklahoman geunden zegoeneko) eta bertako KOA kanpinera joan ginen. KOA USA-ko kanpin katerik handiena da. Zerbitzu asko du kanpinak baina garestixeagoa da. Hala ere, bertako igerilekuan bidaiaren hautsa uzteko aprobetxatu egin genuen. Kanpin inguruan jatetxe dexente zegoen eta guk aukeratu egin genuen xelebreena: Pauline´s buffet. Barruan zegoen jendea arras xelebrea zen, baina nahi adina afaltzeko aukera edukita ere, janaria ez zen izan batere gure gustukoa eta segituan joan ginen lotara. Behar handia genuen eta.