Zergatik Route 66?

 

Route 66 delakoa Estatu Batuetan mendebaldetik ekialdera joateko bukatu zen lehendabiziko errepidea izan zen. Urteetan zehar oso bidaiari ezberdinak ezagutu ditu errepideak: lehendabiziko kotxedunak, etorkizunaren bila abiatutako jende xehea, ejerzitoaren kamioiak, etab.

 

Lurralde hartako bilakaera azkarraren lekuko ezin hobea izan zen errepide hau. Hala ere, bilakaera horrek, beste hainbat gauza bezala, Route 66 bera ere alde batera utzi zuen. Autopistatzarrek ikur honen bukaeraren hasiera suposatu zuten... Bidaiaririk gabe, bere alboetan egondako hainbat eta hainbat negoziok itxi beharrean izan ziren. Gure N-I zein Iruñerako errepidearen antzera, nolabait azaltzeko. Aipatutako errepide horiek legez Route 66 ere ez da gaur egun bere osotasunean mantentzen. Autopistek jan dute zati askotan. Hala ere, tarte eder asko mantentzen dira, inguruetako jendeak erabiliak gehienbat.

 

Egun, Estatu Batuetan ekonomiaren edozein arlotan kate handiak dira nagusi. Gure inguruan McDonnalds da ezagunena, baina jatetxe, hotel, supermerkatu, gasolindegi eta beste hainbat eta hainbat negoziotan izen bakan batzuk, denak igoalak, nagusi dira bertan. Herri bat beste batetik ezberdintzea arras zaila suertatzen da. Sarreran zein irteeretan negozio berdinak kausitzen ditugu. Hiri erdian, aldiz, negozio berri horiek hildako herriaren arima galdua: hainbat eta hainbat lokal huts. Estandarizazioa jaun eta jabe inguru guztietan. Guztietan? Ez!

 

Route 66 honen alboan bizirik iraun dute hainbat negozioek. Aspaldiko gizarte baten ikurrak bilakatu dira, herri guztiak berdinak ez ziren garai baten lekuko. Errepidearen inguruan halako berpizkunde bat eman da azkeneko garaietan. Route 66-k bere 75. urteurrena ospatu berri du eta hori dela eta, aspaldiko Estatu Batuen arimaren bila honelako berpizkundea ezagutu du. Hollywood-eko pelikuletan nekez agertzen den AEB-ak ezagutzera joan ginen gu biok gure motoaren gainean, eta bidaiatzea gogoko duen edozein pertsonari gomendatzen diogu oso. Zure ordenadoretik hasi nahi baduzu bidaia, hona hemen toki aproposa. Kuriositateak jota, gure bide berdinean abiatzea erabakitzen baduzu, hemen argitzen ez zaizkizun hainbat gai zuzenean guri galdetzera animatzen zaitugu.

 

Irakurri, bada, gure bidaiaren berri. Une batez igo gure motora eta Route 66 pittin bat ezagutu zure ordenagailutik!!